ਤਾਜਾ ਖਬਰਾਂ
ਟੀਮ ਇੰਡੀਆ ਦੇ ਸਟਾਰ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਐਂਡਰਸਨ-ਤੇਂਦੁਲਕਰ ਟਰਾਫੀ ਦੌਰਾਨ ਚੌਥੇ ਟੈਸਟ ਮੈਚ ਵਿੱਚ ਜ਼ਖ਼ਮੀ ਹੋ ਗਏ ਸਨ, ਜਿਸ ਕਾਰਨ ਉਹ ਲੰਬੇ ਸਮੇਂ ਤੋਂ ਕ੍ਰਿਕਟ ਦੇ ਮੈਦਾਨ ਤੋਂ ਦੂਰ ਸਨ। ਹੁਣ ਪੰਤ ਟੀਮ ਇੰਡੀਆ ਵਿੱਚ ਵਾਪਸੀ ਕਰਨ ਲਈ ਸੈਂਟਰ ਆਫ਼ ਐਕਸੀਲੈਂਸ (CoE) ਵਿੱਚ ਸਖ਼ਤ ਮਿਹਨਤ ਤੋਂ ਬਾਅਦ ਮੈਦਾਨ 'ਤੇ ਦੁਬਾਰਾ ਪਰਤ ਆਏ ਹਨ। ਮੈਦਾਨ 'ਤੇ ਵਾਪਸੀ ਤੋਂ ਬਾਅਦ, ਰਿਸ਼ਭ ਪੰਤ ਨੇ BCCI ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਹ ਕਿਵੇਂ ਦੁਬਾਰਾ ਪੂਰੀ ਤਰ੍ਹਾਂ 'ਸੁਪਰਫਿੱਟ' ਹੋਏ ਹਨ।
'ਸ਼ੁਰੂਆਤ ਤੋਂ ਹੀ ਚੁਣੌਤੀਪੂਰਨ ਸੀ'
ਪਿਛਲੇ ਕੁਝ ਸਾਲਾਂ ਤੋਂ ਰਿਸ਼ਭ ਪੰਤ ਕਈ ਸੱਟਾਂ ਨਾਲ ਜੂਝ ਰਹੇ ਹਨ, ਜਿਸ ਕਾਰਨ ਉਨ੍ਹਾਂ ਦੀ ਵਾਪਸੀ 'ਤੇ ਸਾਰਿਆਂ ਦੀਆਂ ਨਜ਼ਰਾਂ ਟਿਕੀਆਂ ਰਹਿੰਦੀਆਂ ਹਨ। ਪੰਤ ਹਾਲਾਂਕਿ ਹਮੇਸ਼ਾ ਧਮਾਕੇਦਾਰ ਅੰਦਾਜ਼ ਵਿੱਚ ਹੀ ਵਾਪਸੀ ਕਰਦੇ ਹਨ ਅਤੇ ਦੱਖਣੀ ਅਫ਼ਰੀਕਾ ਖ਼ਿਲਾਫ਼ ਆਗਾਮੀ ਸੀਰੀਜ਼ ਤੋਂ ਵੀ ਅਜਿਹੀ ਹੀ ਉਮੀਦ ਹੈ। ਫਿੱਟ ਹੋਣ ਤੋਂ ਬਾਅਦ ਉਨ੍ਹਾਂ ਨੇ BCCI ਨਾਲ ਗੱਲਬਾਤ ਦੌਰਾਨ ਕਿਹਾ:
"ਮੈਨੂੰ ਲੱਗਦਾ ਹੈ ਕਿ ਸ਼ੁਰੂਆਤ ਤੋਂ ਹੀ ਇਹ ਮੇਰੇ ਲਈ ਕਾਫ਼ੀ ਚੁਣੌਤੀਪੂਰਨ ਸੀ। ਇੰਗਲੈਂਡ ਵਿੱਚ ਮੇਰੇ ਪੈਰ ਵਿੱਚ ਫ੍ਰੈਕਚਰ ਹੋਣਾ ਅਤੇ ਉਸ ਤੋਂ ਬਾਅਦ ਪੂਰੀ ਪ੍ਰਕਿਰਿਆ ਵਿੱਚੋਂ ਲੰਘਣਾ ਇੱਕ ਵੱਡੀ ਚੁਣੌਤੀ ਸੀ। ਇਸ ਪ੍ਰਕਿਰਿਆ ਦਾ ਪਹਿਲਾ ਹਿੱਸਾ ਸਿਰਫ਼ ਹੀਲਿੰਗ (ਜ਼ਖਮ ਭਰਨਾ) ਸੀ। ਪਹਿਲੇ ਛੇ ਹਫ਼ਤਿਆਂ ਤੱਕ ਤੁਹਾਨੂੰ ਪਹਿਲਾਂ ਆਪਣੇ ਫ੍ਰੈਕਚਰ ਨੂੰ ਹੀਲ ਕਰਨਾ ਸੀ ਅਤੇ ਇਸ ਤੋਂ ਬਾਅਦ CoE ਆਉਣਾ ਸੀ। ਇਹੀ ਯੋਜਨਾ ਸੀ ਅਤੇ ਮੈਂ ਵੀ ਇਹੀ ਕੀਤਾ।"
ਇੰਡੀਆ 'ਏ' ਲਈ ਕਪਤਾਨ ਵਜੋਂ ਵਾਪਸੀ
ਰਿਸ਼ਭ ਪੰਤ ਇਸ ਸਮੇਂ ਇੰਡੀਆ 'ਏ' ਲਈ ਕਪਤਾਨੀ ਕਰਦੇ ਹੋਏ ਮੈਦਾਨ 'ਤੇ ਵਾਪਸੀ ਕਰ ਰਹੇ ਹਨ।
ਇਸ ਮੁਕਾਬਲੇ ਦੀ ਪਹਿਲੀ ਪਾਰੀ ਵਿੱਚ ਉਹ ਬੱਲੇ ਨਾਲ ਸਿਰਫ਼ 17 ਦੌੜਾਂ ਬਣਾ ਕੇ ਆਊਟ ਹੋ ਗਏ।
ਹਾਲਾਂਕਿ, ਖ਼ਬਰ ਲਿਖੇ ਜਾਣ ਤੱਕ ਉਨ੍ਹਾਂ ਨੇ ਵਿਕਟ ਪਿੱਛੇ 3 ਸ਼ਿਕਾਰ ਵੀ ਕੀਤੇ ਹਨ।
ਦੱਸਣਯੋਗ ਹੈ ਕਿ ਦੱਖਣੀ ਅਫ਼ਰੀਕਾ 'ਏ' ਖ਼ਿਲਾਫ਼ ਦੂਜਾ ਮੁਕਾਬਲਾ ਵੀ ਪੰਤ ਦੀ ਕਪਤਾਨੀ ਵਿੱਚ ਹੀ ਖੇਡਿਆ ਜਾਵੇਗਾ। 14 ਨਵੰਬਰ ਤੋਂ ਦੱਖਣੀ ਅਫ਼ਰੀਕਾ ਖ਼ਿਲਾਫ਼ ਖੇਡੀ ਜਾਣ ਵਾਲੀ 2 ਮੈਚਾਂ ਦੀ ਸੀਰੀਜ਼ ਤੋਂ ਪਹਿਲਾਂ ਪੰਤ ਫਾਰਮ ਵਿੱਚ ਵਾਪਸੀ ਕਰਨਾ ਚਾਹੁੰਦੇ ਹਨ, ਤਾਂ ਜੋ ਉਹ ਕੌਮਾਂਤਰੀ ਪੱਧਰ 'ਤੇ ਪਹਿਲੀ ਪਾਰੀ ਤੋਂ ਹੀ ਧਮਾਲ ਮਚਾ ਸਕਣ।
Get all latest content delivered to your email a few times a month.
